LEGAZPI CITY- Nagluwas na an datos kan Swine Inventory kan Probinsya nin Albay makalihis an limang bulan na pagsasagibo kan imbentaryo sa probinsya.
Sa intrevista kan Bombo Radyo Legazpi kay Dr. Pancho Mella, an Provincial Veterinarian sa Albay, uminabot na sa 78,782 heads an bilang kan mga orig sa Albay base man sa datos hale sa Philippine Statistics Authority na kun sain halangkaw pa man an bilang kan orig magpuon sa bulan kan Enero hasta Abril.
Aminado man an opisyal na nagbaba an bilang kan mga orig sa Albay kung ikukumparar sa mga nakalihis na taon. Apwera kaya sa padagos pa an repopulation na pinagsasagibo kan D.A ay dugang pa na takot an nagkapirang mga hog raisers na mag-ataman nin orig huli sa nakalihis na sitwasyon kan ASF.
Inasigurar man kan Albay Veterinary office na bastante pa man an supply kan orig sa probinsya asin kaya pang nasusustiniran an pangangaipo kan probinsya sa karne nin orig.
Mantang nagtitinir na nasa Pink Zone an bilog na probinsya sa kaso kan ASF.
Mientras tanto ipinagbubusol man ngunyan kan AVO an pag’aataman nin mga native na manok o back yard chicken bilang alternatibo sa mga dae pa nakakapagataman nin orig.
