LEGAZPI CITY—Pinahimutikan ni dating ACT Teachers party-list Rep. France Castro asin ibang miyembro kan Makabayan bloc an mga akusasyon kan ex-marines na nagresibe suboot sinda nin kwarta gikan sa dating kongresista na si Zaldy Co.
Segun ki Former ACT Teachers party-list Representative France Castro, sa intrevista kan Bombo Radyo Legazpi, saro suboot na ‘kautikan’ an mga sinabi, akusasyon, o istorya kan mga nasabing ex-marines na ipagdawit an saindang mga pangaran, partikular na siya, dating Gabriela party-list Rep. Arlene Brosas asin dating Kabataan party-list Rep. Raoul Manuel.
Bagsak man suboot kun hihilingon man an kredibilidad kan mga ex-marines huli sa enot na affidavit ninda an iba man an listahan siring man sa ikaduwang affidavit.
Dugang niya na politically motivated ini huli sa an mga nadawit na pangaran an imbuelto sa pagsunad nin impeachment complaint laban ki VP Sara Duterte.
Siring man na warang kakaiba kun nakikipaghilingan sinda ki Co huli sa natural an makipaghilingan an Makabayan asin iba pang kongresista asin parte ini kan leadership asin may kinaaraman sa kadakol na isyu sa Kongreso.
Pagdoon ni Castro na saro ining ‘demolition job’ kan kampo ni Duterte na ginamit an 18 ex-marines huli sa pagbusol ninda kan impeachment kontra sa bise presidente.
Sinabi man kaini na dae sinda imbuelto sa mga flood control projects o infrastructure projects puon 2013 o mga kickbacks.
Mientrastanto, pighayag pa niya na an nasabing hearing an sa hiling ninda na sarong ilegal huli sa bako na ini an saindang pigbibisto bilang mayorya kan Senado.
