Pigpaplano ni dating Presidente Rodrigo Duterte na magdalagan liwat bilang Presidente sa 2028 national elections en kaso matangkas suboot sa pwesto an aki na si Bise Presidente Sara Duterte sa paagi kan impeachment.
Segun ki dating House speaker asin Davao del Norte First District Pantaleon Alvarez, kuwalipikadong kumandidato liwat an dating presidente.
Pigtaram ni Alvarez na dae saklaw kan constitutional ban si Digong huli ta bako ini reelectionist asin nagpahingalo nin pirang taon makalihis an anom na taong termino kan manggana ini kan 2016 presidential elections.
Susog sa Saligang Batas, bawal kumandidato an sarong Presidente kun katatapos pa sana kan termino kaini alagad sa kaso ni Digong kuwalipikado ining magdalagan sa 2028 national polls.
Nagtutubod si Alvarez na dakol man giraray na suportadores an dating Presidente asin makusog an magigin laban kaini sa saiyang magigin mga kalaban sa presidential race sa 2028 national elections.
Sa presente, susog pa sa solon na nakaantabay an dating presidente sa posibleng kahantungan kan impeachment laban sa aki na si VP Sara.
Enot nang pigtaram ni Digong sa paghampang kaini sa imbestigasyon kan Quad Comm na preparado siyang magin abogado kan saiyang aki sa mga alegasyon laban digdi kairiba na an suboot irregularidad sa paggastos kan P612.5 bilyong confidential fund sa opisina kan Office of the Vice President asin DepEd sa panahon kan saiyang panunungkulan.
