Kinumpirmar ni dating Presidente Rodrigo Roa Duterte na pigsugo niya si dating Philippine Charity Sweepstakes Office General Manager Royina Garma na maghanap nin mga pulis ngani na magamit sa kontra iligal na droga.
Marurumduman na ipigbuyagyag ni Garma sa huring pagdangog kan Quad Comm na inapudan siya ni Duterte kan May 2016 asin pigpapahanap siya nin mga pulis na may kapasidad na mag implementar kan drug war basado sa ‘Davao Model.’
Sa sarong intrevista, sinabi ni Duterte na malalaoman an nasabing mga pulis sa anuman na ipapatrabaho kasabay kan pondong itatao sainda.
Dae na man idinetalye pa kan dating presidente kun anong proyekto an ipinakapot sa nasabing mga pulis.
Nilinaw man kaini na dae niya ipigsugo sa mga pulis na gumadan nin mga drug personalities karibay nin kwarta.
Segun ki Duterte na igwang nakatagamang pondo para sa kampanya kontra iligal na doga alagad para ini sa operational expenses asin bako bilang pabuya sa mga pulis na makakagadan nin mga drug personalities.
Kinumpirmar man kan dating presidente an kasuguan sa mga pulis na kun manlalaban an mga drug personalities sa mga operasyon, may diretsos an mga ini na protehiran an saindang sadiri.
