LEGAZPI CITY-Inako na kan International Criminal Court (ICC) bilang testigo si dating Philippine Charity Sweepstakes Office (PCSO) General Manager Royina Garma segun ki dating Sen. Antonio Trillanes IV.
Si Garma enot na naghale sa Pilipinas kan Setyembre 2025 pasiring sa Malaysia.
Sa nasambitang nacion, pigtutubudan na nakaolay niya an sarong dai nginaranan na opisyal kan ICC, basado sa mga naenot na rebelasyon ni Garma sa National Bureau of Investigation, bago an saiyang pagbiyahe.
Pirang semana makalihis siyang maghale sa Pilipinas, sarong mandamiento de aresto an ipinaluwas laban ki Garma, huli sa suboot pagkaimbwelto kaini sa pag-ambush kay dating PCSO board secretary na si Wesley Barayuga.
Sa pahayag ngonian na aldaw, sinabi ni Trillanes na matestigo si Garma laban ki dating Presidente Rodrigo Duterte matapos na akoon bilang testigo.
Huli kaini, hinale man siya sa listahan kan mga indibidwal na imbwelto sa kaso na kinakahampang kan dating presidente sa international tribunal.
Sinabi man ni Trillanes na mantenidong imbwelto sa kaso si dating Philippine National Police Chief General Oscar Albayalde, asin presenteng opisyales kan pulis na si General Romeo Caramat asin General Eleazar Matta.
Kabali man suboot sa listahan si dating National Police Commissioner Edilberto Leonardo.
