Arestado na si dating House Speaker Martin Romualdez kasunod kan arrest warrant na iniluwas kan Sandiganbayan Third Division.
Isinirbi an warrant of arrest sa laog kan Cardinal Santos Medical Center sa San Juan City.
Isinugod asin na-confine si Romualdez sa nasabing ospital makalihis makaeksperyensya nin cardiovascular complication.
Kinumpirma ni Interior Secretary Jonvic Remulla na si Romualdez an pigkonsiderar nang Person Deprived of Liberty (PDL) mantang nasa irarom nin kustodiya kan gobierno sa ospital.
Nag-ugat an pag-aresto sa P7.4-bilyong plunder case na isinunad kan Office of the Ombudsman sa Sandiganbayan katakod kan mga suboot kickback asin anomalya sa mga flood control projects puon 2022 hanggang 2025.
Warang inirekomendang piyansa ang Sandiganbayan Third Division para sa saiyang temporamenteng libertad huli an kasong plunder an sarong non-bailable offense. Nagluwas man an korte nin hold departure order (HDO) laban saiya asin sa saiyang mga kapwa akusado.
Afuera ki Romualdez asin Co, pigpaarestar man sinda Joselyn Tragua Serenio, personal assistant ni Romualdez, asin Felicito Cristobal Guevarra, presidente kan Samchan Foreign Exchange Corporation.
Sinabi man ni Atty. Ade Fajardo, legal counsel ni Romualdez na pwedesir na-pressure sana si dating Public Works Secretary Manuel Bonoan nganing idawit an dating House Speaker sa iskandalo.
Hinagad man kan kampo ni Romualdez na magkaigwa nin impormasyon sa 28 na bagong witness.
