LEGAZPI CITY — Kinumpirmar ni Police Chief Inspector Arthur Gomez na mabalik na sa posisyon an dating hepe kan Legazpi City Police Station makalihis an nagkapirang bulan na pagsasairarom kaini sa restrictive custody.
Segun sa opisyal, an reinstatement ni P/Supt. Nilo Berdin Jr. an katakod kan deliberasyon na ginibo kan mga opisyal kan kapulisan sa rehiyon na nag-uyon na ibak na ini bilang hepe kan nasambitan na hepatura.
Marurumduman na nagsairarom ini sa restricted custody makalihis na sangatan nin kasong pagbayolar sa Anti-Torture Act huli sa suboot na pangungulog sa preso na tulos man na ibinasura kan prosekusyon.
Katakod kaini, mare-relieve na man sa posisyon an presenteng officer in charge kan Legazpi PNP na si P/Supt. Eymard Gomez ngani na dae suboot maka apektar sa nagpapadagos na imbestigasyon kan isyung pinagkakahampang kan hepatura dapit sa pagkagadan ni Michael Obogne.
Sinierto man ni Gomez na warang mangyayaring white wash asin malalaoman kan publiko an patas na imbestigasyon.
Mientras tanto, mabalik na sa dati kaining assignment sa Camp General Simeon Ola si P/Supt. Gomez.
Sa intrevista kan Bombo Radyo Legazpi ki Gomez, pighayag kaini na bukas sa saiyang buot an pagkaka relieved saiya huli ta ipigdesignar man sana siya bilang officer in charge kan magsairarom sa restricted custody an dating hepe.
Dugang pa kaini na naresibe na niya an relieve order asin pigpa-plantsa na sana na mga kaipuhan na asikasuhon.
Ngunyan na hapon, pormal nang mabalik si Berdin asin pinaglalaoman na maipagpapadagos an imbestigasyon sa mga pigkakahampang na kontrobersiya kan nagkapira sa mga tauhan kan Legazpi PNP.
