LEGAZPI CITY – Pighahanap na ngunyan kan mga otoridad an suspek sa pambabadil gadan sa sarong mediamen sa Sitio Feeder Road, Barangay Bacolod, Masbate.
Binisto an biktima na si Joaquin Briones na bisto man bilang dating hard-hitting local commentator.
Sa impormasyon na naguno kan Bombo Radyo Legazpi, napag-araman na nagsapar nin apat na tama nin badil sa likod an biktima na rason kan tulos na kagadanan kaini.
Tanyag man si Briones sa apod na “Dos por Dos” na sarong kolumnista sa sarong national tabloid asin tugang kan editor-in-chief asin publisher kan Pilipino Mirror newspaper na si Rey Briones.
Sa sarong intrevista pighayag ni rey Briones na nagtutubod sindang warang kinaaraman an nangyaring pambabadil sa propesyon kan saiyang tugang bilang journalist huli ta mga national issues sana an pigtutukar kaini.
Dakula man an saindang pagtubod na konektado sa politika an pagadan ki Briones huli ta minsan na man ining nagdalagan bilang bise alkalde sa nasambitan na banwaan.
Sa presente nagpapadagos pa an ipigkokundusir na imbestigasyon kan mga otoridad dapit sa nasambitan na pambabadil.
Kun marurumduman, Disyembre kan nakalihis na taon kan pagbabadilom man an sarong broadkaster sa probinsya kan Catanduanes na si Larry Que na pigtataram na pinaka enot na mediamen na ginadan sa irarom kan Duterte administration.
