LEGAZPI CITY-Tinawan doon kan Department of Justice na bako otomatikong ‘state witness’ na tulos si dating Department of Public Works and Highways Engineer Henry Alcantara.
Ini maski pa nagbalik si Alcantara kan bulto-bultong kwarta na nasamsam hale sa maanomalyang flood control projects kan gobierno.
Marurumduman na idinara sa Department of Justice an mga hinabo na kwarta na nagkakantidad nin nasa P110-Milyon.
Nilinaw man ni Justice Acting Secretary Fredderick Vida na dai nangangahulugan o katumbas na tulos ini kan saiyang pagigin ‘state witness’.
Paliwanag niya pa na parte sana an ‘restitution’ o pagbabalik sa kwarta sa proseso kan kagawaran para sa mga nasa ‘witness protection program’.
Kun sain kaiba an pagtataram kan bilog na naaaraman nin may katotoohan asin an pagigin ‘in good faith’ kaiba an ‘restitution’.
Nagtutubid man si Justice Acting Secretary Vida na an pagbabalik sa nasamsam na kwarta an dapat sana ngani makamit an katarungan.
Sa presente wara pang napipili an kagawaran na gigibuhong ‘state witness’, magin si Henry Alcantara an nasa provisionally admitted pa sana para sa ‘witness protection program’.
Kasunod kaini, positibong naglalaom an kampo kan imbueltong dating opisyal na siya an mapipili pa bilang sarong ‘state witness’ sa kaso kan maanomalyang flood control projects.
