LEGAZPI CITY – Sinugo kan Commission on Audit si dating Albay governor Noel Rosal asin agom kaini na si Legazpi City Mayor Carmen Geraldine Rosal na ibalik an nasa P60 milyon na pondo na iligal na ginastos kan taong 2022.
Base sa desisyon kan komisyon, nagluluwas na iligal an paggastos ni dating Governor Rosal sa P26.58 million na ginamit sa pagtatao nin financial assistance sa mga tricycle drivers asin senior citizens.
Ipinanao an nasabing asistensya maski pa panahon na nin eleksyon kan taong 2022 kung kaya pagbayolar ini sa Omnibus Election Code.
Pigpapabalik man kan komisyon an nasa P38.1 milyon na economic welfare assistance asin insentibo na itinao ni Mayor Carmen sa mga opisyal asin empleyado kan Legazpi kan taon man na 2022.
Nasa P30,000 na incentives asin sarong bulan na sahod an itinao sa mga nakaresibe kan benipisyo.
Kaiba pa sa mga sinugo na ibalik an nagastos na pondo iyo sinda City treasurer Carlita de Guzman, accountant Gloria Aringo, disbursing officers na sinda Vilma Pujol, Constance Oliveros asin Imelda Mayor, asin social welfare and development officer na si Maria Marlene Manaya.
Alagad an kantidad sana na saindang naresibe an pigpapabalik kan komisyon.
Magigirumduman na dati ng napahali sa pwesto si dating Governor Noel Rosal huli sa kaparehong reklamo nin paggastos kan pondo kan gobyerno sa panahon nin eleksyon.
Mientras tanto, binalo kan Bombo Radyo Legazpi na hagadan nin reaksyon an pamilya Rosal manungod sa isyu alagad dae muna ini nagtao nin pahayag.
