LEGAZPI CITY- Kinumpirmar kan Police Regional Office 5 (PRO5) na dating hepe kan Albay an saro sa mga kaibanan sa pinakabagong “drug matrix” na ipigluwas ni Presidente Rodrigo Duterte na ipig-iimbwelto sa illegal drug transaction.
Ipighayag ni PNP Bicol spokesperson PC/Insp. Maria Luisa Calubaquib sa ekslusibong intrevista kan Bombo Radyo Legazpi na enot nang ni-relieve sa posisyon si P/Supt. Lorenzo Bacia, dating hepe kan Ligao City PNP bilang parte kan lakdang kan gobierno sa pagbawas sa pagkaka-imbwelto kan mga opisyal sa iligal na droga.
Dugang pa ni Calubaquib na nagtetenir na an nasabing opisyal sa PNP National Headquarters sa Kampo Crame mantang si P/Supt. El Cid Roldan na man an nagkakapot kan posisyon sa presente puon kaitong Agosto 20.
Inasegurar man kaini an dagos-dagos na internal cleansing sa lado tangarig na maaraman asin matawanan nin magkakanigong aksyon an mga erring officials.
Klinaripikar man kaini na dakol an rason kun nata nare-relieve an mga hepe sa pinagsisirbihang police unit kaibanan na an pag-abot sa two-year timeline sa lugar, paglaog kan bagong ni-request na chief of police kan local chief executive o nahahampang sa anumang kaso.
Mientras tanto, laoman na suboot an mga masunod pang balasahan, bako sana sa rehiyon kundi sa iba pang regional police offices na parte kan paghahanda sa 2019 midterm elections.
