LEGAZPI CITY- Pig-aantisiparan na naresibe na kan mga lokal na gobierno ngonian na aldaw an ibinabang orden kan Mines and Geosciences Bureau (MGB) Bicol sa pagpapapundo kan mga quarry operations.
Sa intrevista kan Bombo Radyo Legazpi ki MGB Bicol Director Engr. Guillermo Molina Jr., nagkaigwa na nin pag-oolay an mga personahes kan ahensya sa manlain-lain na parte kan rehiyon susog sa nagin direktiba ni Environment Secretary Roy Cimatu.
Kaibanan sa mga nadiskutir an pagkrear kan walong team na compuesto kan 48 personnel na maglilibot maski sa mga hararayong lugar tangarig na maasegurar na pundo na an sand, gravel, quarry asin dregding operations.
Segun ki Molina, nasa darakulang operasyon kan quarry an tututukan sa laog kan tulong aldaw partikular na an cement plant sa Camalig Albay siring man an korporasyon sa Legazpi City asin Baao sa Camarines Sur.
Mientras tanto, naglalaom man an opisyal na masasabutan an mga mapependienteng patrabaho urog na pigsusunod man sana an instruksyon na para sa ikakarahay kan lambang saro.
Naghuma man an opisyal nin magkakanigong penalidad sa mga mapoprobarang nagpapalusot kan mga aggregates sa tahaw kan pagsuspinder kan gabos na operasyon sa rehiyon.
