Daragitang sinugong magbayad sa lending, nadukayang gadan asin pinagtutubudang nilugusan

LEGAZPI CITY — Isinaysay kan barangay kapitan sa Brgy. Natasan, banwaan kan Libon, Albay an mga pangyayari antes an pagkakadiskubre sa wara nang buhay na hawak kan sarong 13-anyos na daragita.
Susog sa intrevista kan Bombo Radyo Legazpi ki Brgy. Kapitan Isabelita Relato, sinugo suboot si Karen kan ina kaining magbayad sa lending kun saen nag-agi pa sa mismong harong kan opisyal.
Sinabihan pa ni Relato an daragita na maghapit sa harong ninda sa pag-uli kaini mientras na nagpasiring man an kapitan sa centro tangarig na magbayad man kan sa lending kun saen nagkatuparan pa sinda ni Karen. Alagad, naenot man giraray ini maguli huli sa inasikasong problema ni Kapitan.
Kan paguli kan opisyal sa harong ninda saka niya nahiling an naghihibing ina kan daragita na pighahanap ini huli ta dae pa man suboot nag-uuli sa harong. Nagtabang naman si Relato sa paghahanap hasta sa makaabot sa parte kan kale harani sa harong kan mga ini kun saen ninda nahiling an patak nin dugo.
Huli digdi, tulos na naghagad nin tabang sa pulisya kan Libon an opisyal asin sa paghahanap kaibanan an mga otoridad, nahiling ninda an bagay na natatahuban nin mga dahon kan lubi-lubi asin kan buksan, saka nakumpirmar na ini an pighahanap na daragita.
Nagtutubod man an mga ini na nilugusan muna antes na ginadan an daragita huli ta wara na ining sulot na pang-ibaba mientras na nakua man dikit sanang distansya sa lugar an sulot kaining pantalon asin underwear. Sa enotan pang dikit kan mahiling man an kolor amarillong T-shirt na panlalaki.
Sa presente, dinara na an bangkay sa punerarya tangarig na isairarom sa otopsiya.