LEGAZPI CITY – Ipiglatag na kan Daraga Public Safety Office an saindang security meassures sa banwaan ngunyang paparani na an kapaskuhan.
Segun kay Daraga PSO spokesperson Lorenzo Bañas sa intrevista kan Bombo Radyo Legazpi na preparado na an saindang opisina nganing magtaong asistensya asin magpaotob nin pazy orden sa oras na isagibo an lighting ceremony kan pamosong tunnel of lights sa banwaan.
Piglalaoman na gigibuhon sa masunod na semana an lighting ceremony nin huli ta nagpromesa an Local Government Unit na bubuksan an tunnel of lights bago magpoon an simbang gabi asin tulos man sindang mapaotob nin road closure enkaso magtao nang direktiba si Acting Mayor Jaucian.
Pigdugang man ni Bañas na igwa mang idedeploy urualdaw na Daraga PSO personel nganing magmantenir kan seguridad sa oras na binuksan na an tunnel of lights nin huli ta bibisitahon suboot ini kan mga muya magpasyar mantang piglalaoman man ninda an pagkakaigwa nin mga bumper to bumper traffic sa manlain-laing parte kan banwaan nin huli ta kadaklan sa mga ini an agihan pasiring sa mga nagkapirang probinsya sa rehiyon arug kan Sorsogon.
Posible man suboot na dagsaon an mga publikong merkado sa banwan sa maabot na petsa 22 hasta sa 24 nin huli sa mga masaraod asin mauruli nganing sabaton sa mga saindang kaharongan an kapaskuhan.
Mientrastanto, naglatag na man sinda nin security measures sa Daraga Church para sa papaabot na misa de aguinaldo nganing mamantenir an pagigin banal asin katuninungan kan simbahan.
Bantay sarado man kan saindang opisina an mga nagkapirang saudan nganing masyerto an kaligtasan kan mga parabakal antes an mga paratienda.
Pagirumdom kan opisyal sa mga mapasyar sa saindang banwaan na magin rigmat sa palibot, dae magdara nin dakol na kwarta asin bantayan an mga burubitbit na mga gamit nganing maibitaran an insidente nin panghahabon.
