LEGAZPI CITY – Padagos an patanid kan Daraga Public Safety Office sa mga traysikel driver na dae maghagad o magsingil nin overpriced na pamasahe sa mga pasahero na mapasiring sa banwaan.
Magigirumduman kaya na mahigot na ipigdoon kan saindang ofisina sa mga traysikel driver na wara sindang sasaltuhon kun imbwelto an mga ini sa paghagad nin overprice na pamasahe sa mga pasahero.
Huli na man kaya ini sa pig-aantisiparan na aktibidad kan Daraga kun kaya piglalaoman ninda na maruso an tawo nganing magdalan asin makikisumaro taodtaod na banggi.
Segun ki Daraga PSO spokesperson Lorenzo Bañas sa intrevista kan Bombo Radyo Legazpi na haloy na nindang pigsabihan an mga toda president asin mga driver na dae na pagsamantalahon an ruso kan tawo sa paghagad nin overpriced na pamasahe.
Madepende na sana suboot iyan kun talagang harayo o madistansya an destinasyon na pigdumanan o pighalean kan pasahero.
Rigmat man an saindang mga personahe sa mga insidente nin mga panghahabon o shoplifting pag-aldaw asin pagkabanggi partikular na kun may mga aktibidad na ipigsasagibo an banwaan kan Daraga.
