LEGAZPI CITY — Inasegurar kan Daraga Municipal Police an koordinasyon sa iba pang counterpart agencies sa pagbabantay sa konstruksyon asin pormal nang pagbubukas kan Bicol International Airport sa taong 2020.
Segun ki P/Supt. El Cid Roldan, hepe kan Daraga Municipal Police, dakulang orgulyo kan mga Albayano an nasabing proyekto na makakatabang sa pagtalubo kan turismo asin ekonomiya sa lugar.
Binalikan man ni Roldan an tolong insidente nin harassment sa nasabing erpuerto na rason tangarig na mapendiente an nakatalaan kutang completion kaini kan taong 2016.
Afuera man sa problema sa seguridad huli sa mga rebelde, nakatalaan man na i-relocate an sarong tower kan National Grid Corporation of the Philippines (NGCP) tangarig na dae masabitan kan mga darakulang eroplano.
Pighihiling man na ibalyo sa nasabing lugar an hepatura kan pulis para sa mas marikas na pagresponde.
Klarado man, segun ki Roldan na nai-eksplikar an magigin papel kan kada unit para sa nasabing erpuerto.
