LEGAZPI CITY- Labi an panghihinayang kan sarong daraga sa Purok 1 Barangay San Lorenzo, syudad kan Tabaco makalihis na madaya nin sarong swindler o budol-budol.
P16,000 an kabilugang kwarta na nakua sa biktimang si Edel Queen Boringot na para kuta sa ina kan saiyang nobyo na suboot nangangaipo nin dakulang kwarta huli ta naka-confine sa ospital.
Sigon ki Boringot, may nag-apod saiya sa cellphone na nagpabistong tugang kan saiyang nobyo asin naghahagad nin P10,000 para sa naghehelang na ina.
Tulos man na ipinadara kaini an pighahagad na kantidad sa paagi kan Smart Padala na may card number na hale sa nagpabistong tugang kan saiyang nobyo.
Makalihis sana an pirang oras, liwat na nagtext an suspek alagad iba nang numero an gamit na naghahagad giraray nin kwarta kun kaya pinadarahan nya nin P4,000.
Nasunudan pa ini asin pinadarahan nya pa nin dugang na P2,000.
Hudyan na kan mamalisyahan ni Boringot na bako man si Bless na tugang kan saiyang nobyo an nag-aapod saiya kundi sarong swindler.
Saiya man na naaraman na dae man nin helang an ina kaini.
Mientrastanto, binalo kan Tabaco City Police na magsagibo nin entrapment operation ngani na madakop an nanloko sa biktima alagad dae na liwat na nag-apod ki Boringot.
Katakod kaini, liwat na nagpatanid an pulisya na dae basta magtiwala sa dae bistong tawo urog pa na pigagamit na ngunyan kan mga manloloko an Smart Padala.
