LEGAZPI CITY- Apelar ngunyan ni Daraga Mayor Carlwyn Baldo an tabang ni Presidente Rodrigo Duterte sa patas na imbestigasyon sa pigkakaimbweltuhan na kaso.
Ini an katakod kan pigkakahampang kan alkalde na kasong double murder asin six counts nin frustrated homicide makalihis itukdong mastermind sa pagadan ki Ako Bicol Party-list Representative Rodel Batocabe.
Sa ipigkondusir na press conference sa saiyang harong sa Barangay Tagas sa banwaan kan Daraga, pigduon kaini na padagos sindang naglalaom sa patas na hustisya.
Segun digdi, hahampangon niya an mga kasong isinunad kontra saiya urog pang wara man siyang kinaaraman sa pagkagadan kan kongresista.
Nangapudan man si Baldo na dae malaag sa alanganin an buhay kan saiyang pamilya.
Mientras tanto, nagpasalamat man an alkalde sa mga taga suporta na padagos na nagtutubod na inosente siya sa mga pigbabatong akusasyon.
Dugang pa kan opisyal na bukas siya sa pagsusunad nin search warrant kan kapulisan huli ta wara man siyang pigtatago alagad nangapudan nin patas na sistema kasabay kan pagkahadit na magtanom nin droga o granada an mga otoridad.
