LEGAZPI CITY — Mahigot an pigkokundusir na monitoring ngunyan kan Philippine National Police sa Bicol region katakod kan pagpupuon kan campaign period.
Segun ki Police Regional Office 5 spokesperson PC/Insp. Malu Calubaquib sa intrevista kan Bombo Radyo Legazpi, an banwaan kan Daraga sa Albay an numero uno ngunyan sa listahan kan election hotspots.
Ini makalihis na makapagrehistro nin kadahasan sa banwaan kan Daraga kaibanan na an pagkagadan ni Ako Bicol Partylist Rep. Rodel Batocabe.
Afuera kaini, pigtututukan man ngunyan kan PNP an mga posibelang mangyaring kadahasan sa provincia kan Masbate asin Camarines Sur na may kinaaraman sa politika siring kan mga nakalihis na pirilian.
Dugang pa ni Calubaquib, igwa man na direktima si PNP chief Director General Oscar Albayalde na bantayan an mga Private Armed Groups (PAGs) na posibleng maghatod suboot nin kariribukan asin kadahasan ngunyan na paparaning May 2019 midterm elections.
Mientras tanto, liwat na ipinagirumdom kan opisyal an pagbabawal sa pagdadara nin badil sa luwas kan saindang residensya katakod kan naga-iral na Comelec gunban.
Napag-araan na pina-recall na man an mga security personnel kan mga lokal na opisyal kaibanan na an mga Bise alkalde asin mga konsehal ngani na makatabang ini sa pagmamantenir kan matoninong na pirilian.
