Uminabot na sa P1.91 billion an kantidad kan datos asin pagkalugi sa sektor kan agrikultura huli sa Southwest Monsoon o Habagat asin mga nakalihis na bagyong Luis, Maymay asin Neneng, basado sa datos kan Department of Agriculture (DA).
Basado sa pinakahuring assessment kan mga regional office, nasa 61,237 na paraoma an naapektaran, mantang labi sa 54,611 ektarya nin agricultural areas an nadistroso.
Pigkakarkulong 7,772 metric tons man nin agricultural commodities an nawara sa produksyon.
Pinakadakula an danyos sa paroy, na uminabot sa P1.07 billion, mantang nasa P610.32 million man an nairehistrong losses sa high-value crops.
Kaibanan sa mga naapektaran na pananom an mga gulay, spices, legumes, prutas siring kan avocado, calamansi, citrus, durian, lanzones, mangosteen, melon, papaya, pineapple, rambutan, strawberry asin watermelon, maging an batag, mangga, root crops asin ornamental crops.
Nasa P92.68 million man an danyos sa mais, mantang P23.62 million an losses sa cassava production.
Mientras tanto, uminabot man sa P16.27 million an danyos sa livestock, kaibanan an manok, urig, baka, karabaw, kambing, tupa, pato, kuneho, asin iba pang ataman na hayop.
Naraot man an mga irrigation facilities na nagkakantidad nin P60.96 milyon, mantang nasa P16.37 million an danyos sa farm structures asin P1.91 million sa machinery asin equipment.
Sa fisheries asin aquatic resources man, uminabot sa P9.26 million an nairehistrong losses.
Bilang tabang sa mga apektadong paraoma, sinabi kan DA na igwang P237.99 million kantidad nin agricultural inputs, kaibanan an banhi nin paroy, mais, asin gulay an pwedesir na ibarewas.
Pwedesir man sindang makakuwa nin pautang na hasga sa P25,000 sa irarom kan Survival and Recovery o SURE Loan Program kan Agricultural Credit Policy Council.
