LEGAZPI CITY- Dakol na mga ataman na ayam asin ikos an nagbenipisyo sa libreng castration asin anti-rabies vaccination na ginibo sa provincia kan Albay kan nakalihis na weekend.
Ini an bilang selebrasyon kan world rabies day kun sain nagkaigwa man nin forum na inatendiran kan mga animal enthusiast.
Segun ki Albay veterinarian Dr. Pancho Mella sa intrevista kan Bombo Radyo Legazpi na solamenteng an antibiotics sana na binakal sa mga botika an ginastusan kan mga fur parents.
Nahiling man kan opisyal na mas nagigin responsable na suboot ngunyan an mga pet owners kumparar sa nakalihis na mga taon.
Napag-araman na magkakaigwa man nin awards sa mga lokal na gobierno na best implemento kan anti-rabies programs, kun sain nagpapadagos na an validation sa compliance sa mga barangay.
Partikular na tututukan an pagsunod sa stray dog elimination.
Mientras tanto, sinierto man ni Mella na padagos an procurement kan provincia nin mga bakuna kontra sa rabies na itatagama para sa mga high risk areas.
Tinawan duon man kaini an responsibilidad kan mga lokal na gobierno sa pagsierto na igwang bastanteng suplay nin anti-rabies vaccine para sa mga hayop asin mga tawo.
