LEGAZPI CITY- Dakol na estudyante an pigkakahandalan na magpundo sa pagklase ngani na maghanap nin trabaho base sa report kan Post-Disaster Needs Assessment (PDNA.)
Tinawan duon kaini na edukasyon an komon na nasasakripisyo ngani na makatabang sa pamilya urog na sa mga probinsya.
Katakod na man ini kan nagrapadong bagyong Nina kan Disyembre 25, 2016 kun sain saro an isla kan Catanduanes sa mga nadistrosong maray.
Sa mga pampublikong eskwelahan, nairehistro kan PDNA an 275 eskwelahan sa probinsya kun sain 121 an naapektaran kan kalamidad.
229 classroom digdi an totally damaged o igwa nin partial major damage na maabot an danyos sa haros P150 milyon.
Dae pa digdi kabale an mga nadistrosong mga pasilidad na nagkakantidad nin labi sa P11.5 milyon.
Bako sana an mga eskwelahan an nadanyaran ni Nina alagad siring man an mga harong kan mga residentes kun kaya mapipiritan an mga jovenes an magtrabaho ngani na maipakarahay an mga naraot nindang istaran.
Suhestyon kan PDNA na gibuhon na abilable an student aid para sa mga pobreng pamilya ngani na maipagpadagos an pagklase kan mga ini urog na an mga ma-gradwar.
Pinansyal na asistensya an pwedesir suboot na itao sa paagi nin pagpapautang alagad haloy na pagpapabayad.
Magigirumduman na an Catanduanes an nagin sentro kan nasambitan na bagyo kun sain digdi nagtama an signal number 4.
