Naghahagad an Department of Agriculture (DA) nin P250-bilyong budget para sa 2027 nganing mapakusog an seguridad sa pagkakan, kabuhayan kan mga paraooma asin parasisira asin katatagan kan ekonomiya.
Sinabi ni Agriculture Secretary Francisco Tiu Laurel Jr. na nagbaba an ambag kan agrikultura sa gross domestic product (GDP) puon 19% kan 2005 sagkod 7.9% makalihis an duwang dekada, huli sa haloy na kakulangan kan pamumuhunan sa sektor.
Segun sa kalihim, an propwestong budget an mas halangkaw kaysa P215 bilyon ngunyan na 2026 asin haros doble na kumpara sa P117 bilyon kan 2022.
Itatagama ini sa farm mechanization, irigasyon, research, cold-chain facilities, digital infrastructure, asin post-harvest systems nganing mapalangkaw an produksyon asin mapababa an presyo kan pagkakan.
Mapadagos man an P30-bilyong Rice Competitiveness Enhancement Fund, mantang nadugangan an pondo kan Philippine Crop Insurance Corporation asin an P20-bilyong taunang pondo para sa pagpapauswag kan livestock sector.
Sinabi man kan kalihim na nag-uswag nin 2.6% ang agrikultura asin pangisdaan kan 2025, ang pinakamarikas sa laog kan walong taon, kasabay kanpagbaba kan presyo nin bagas asin pagbantol kan food inflation.
Siring man, aminado siyang nagtitinir an mga angat siring kan kakulangan sa irigasyon, halangkaw na logistics cost, asin epekto kan climate change kaya kinakaipuhan an padagos na pamumuhunan sa sektor
