LEGAZPI CITY- Hinali kan Department of Agriculture (DA) Bicol an pagkahandal kan publiko manungod sa mga pigsasabing smuggled carrots haling China na nag-aabot na sa Manila.
Sa intrevista kan Bombo Radyo Legazpi kay Emmy Bordado an tagapagtaram kan DA Bicol, dakol na mga imported products haling ibang rehiyon asin maging ibang nasyun an naglalaog sa Bicol alagad gabos man suboot ini an nag-aagi sa mahigot na inspeksyon.
Segun kay Bordado, may mga nakalaag na checkpoints an ahensya sa manlain-lain na entry points asin port area kan rehiyon kung sain pighahagadan nin phytosanitary requirements asin permit an gabos na mga nag-aaging delivery nin produkto kung kaya nasasala an mga naglalaog sa rehiyon.
Sa monitoring kan ahensya, haros gabos man na mga naglalaog na produkto sa rehiyon an nakasunod sa mga pighahagad na rekisitos kung kaya makakaasegurar an publiko na salbado an mga nababakal sa merkado.
Katakod kaini, nag-abiso man giraray an opisyal sa publiko na tulos na magreport sa saindang opisina en kasong makahiling nin mga kaduda-dudang produkto nganing tulos na matawanan nin magkakanigong aksyon.
Napag-araman na nakaabot naman an isyu nin suboot smuggled carrots haling China sa High Value Crops Development Program (HVCDP) asin Agribusiness and Marketing Assistance Service (AMAS) kan Department Agriculture (DA) Central Office na nagsasagibo na sa ngunyan nin magkakanigong imbestigasyon.
Base kaya sa report nagkakawat sana sa P70 kada kilo an pabakal kan imported na carrots rason nganing malugi an mga lokal na paraoma kan Baguio na nagpapabakal kan kaparehong produkto sa kantidad na P115 hasta P125 an kada kilo.
