Inasegurar kan Department of Agriculture na dae magkukulang sa suplay nin orig sa Pilipinas sa ibong kan kaso nin African swine fever.
Segun kay Agriculture Secretary Francisco Tiu Laurel, bako man na bilog na banwaan alagad farm based sana an pigpapaotob na lockdown sa mga lugar na may kaso kan helang.
Huli digdi nakakapagsuplay man giraray nin karneng orig an ibang mga farms na dae nin kaso nin African Swine Fever.
Alagad mahigot man giraray an pigpapaotob na checkpoints ngani na maasegurar na dae na makakalakop pa an helang.
Nagtatao man an ahensya nin ayuda sa mga hog raisers na isinairarom sa culling operation an atamang orig.
Nasa P4,000 an pigtatao sa kada sadit na orig, P8,000 sa medium-sized asin P12,000 sa darakula na.
