LEGAZPI CITY – Pigba-validar na kan Department of Agriculture (DA) Bicol an mga ipigsumitir na damage report kan mga munisipyo asin provincia katakod kan nagpapadagos na El Niño.
Napag-araman na dawa dakol an irrigated areas, igwang mga lugar na nagpaabot naman nin impormasyon sa nanonotarang pagbaba kan lebel kan tubig sa water sources.
Pag-eksplikar ni DA Bicol information officer Emily Bordado sa intrevista kan Bombo Radyo Legazpi, igwa man sindang database na kapot tangarig mahiling kun tugma an ipigdeklarang danyos sa kapabilidad kan land area na yaon.
Aminado kaya an opisyal na igwang nagkapirang lokal na gobierno na halangkawon an kantidad kan danyos na pigsasambit kumpara sa totoong numero.
Sa presente, nasa labi sa P711 million na an kabilugang danyos sa apat na provincia sa Bicol huli sa matinding tag-init, susog sa datos kan Abril
Sa ibong na lado, inako man kan opisyal na padificilan ngonian an pagsasagibo nin cloud-seeding operations sa nagkapirang parte kan rehiyon urog na manipis an panganuron.
Masasayang sana suboot an dakulang gastos kun dae man magin “feasible” an piglalaomang epekto.
