LEGAZPI CITY- Personal na binisita ni Department of Agriculture (DA) Assistant Secretary Daniel Alfonso Atayde an Daraga night market ngani na mahiling an sitasyon kan merkado.
Segun ki Renz Luna, tagapagtaram ni Daraga Mayor Vic Perete, sa intrevista kan Bombo Radyo Legazpi na narisa kan DA official na igwan man liwat na porsyento kan mga pigpapabakal sa night market an bako locally produced.
Nangangahulugan sana suboot ini na igwa pa nin kakulangan sa suplay kan mga produktong pang agrikultura sa lokalidad.
Nagkaigwa man nin suhestyon si DA Assistant Secretary Atayde na magkaigwa nin cold storage facility asin ini an pinag-oolayan sa ngunyan.
Obheto kan nasabing cold storage facility na mapahaloy an buhay kan mga gulay ngani na dae ini nasasayang kun dae tulos maipapabakal.
Enkasong maotob an proyekto, an banwaan kan Daraga an magigin pinaka enot na lokal na gobierno na magkakaigwa kan nasabing pasilidad.
Mientras tanto, sinierto man ni Luna na magpapadagos an suporta kan lokal na gobierno sa mga paroma sa tabang kan Department of Agriculture.
