LEGAZPI CITY – Pinatanidan kan Department of Agriculture (DA) an mga nag-iimbwelto sa backyard hog raising na doblehon an preventive measures na ipigpapaotob tangarig na makaibitar sa anumang nakakaolakit na helang sa mga hayop.
Napag-araman na 70% kan mga nag-aataman nin hayop sa Bicol an nasa backyard hog raising.
Sa intrevista kan Bombo Radyo Legazpi ki DA Bicol spokesperson Emily Bordado, pinaka-vulnerable an mga nasabing orig urog pang kulang an mga ini sa bio-safety kun ikukumpara sa mga darakulang origan.
Dapat suboot na mas magin marigmat an mga kagsadiri sa pag-obserbar asin pagmonitor sa mga sintomas kan helang sa orig.
Magigirumduman na may mga orig na sa nagkapirang barangay sa Rizal an pigsasabing nagadan sa pigtutubudang African Swine Fever alagad wara pa man na kumpirmasyon sa helang an DA central office.
Katakod kaini, abiso an pag-implementar kan kampanya na BABES o Ban Pork Imports sa mga nasyon na may kumpirmadong kaso; Avoid swill feeding o mga tadang pagkaon; Block entry sa international ports; Educate sa mga tawo asin Submit samples para sa surveillance kan mga sintomas.
Mientras tanto, hagad man kaini an kooperasyon kan mga lokal na gobierno sa pagbabantay sa movement kan mga naglalaog na buhay na orig asin processed meat products.
