Ipigbuyagyag ni dating Senador Cynthia Villar na mawot kan saiyang agom na si Manny Villar na ipabakal o i-divest an PrimeWater huli sa mga natipon na reklamo kaini asin sa mga imbueltong isyung pulitikal.
An PrimeWater nahahampang sa kadakol na reklamo gikan sa labing 100 na mga lugar nin joint venture (JVA) na may mga lokal na distrito nin tubig huli sa maluyang serbisyo sa tubig.
Idinepensa ni Cynthia an saindang negosyo, na pigsasabing bako sana an saindang kompanya an dapat basulon sa problema sa tubig.
Pig-eksplikar kaini na an ibang lugar, arog kan San Jose del Monte sa Bulacan igwa nin natural na problema sa supply huli sa halangkaw na elevation.
An PrimeWater sarong subsidiary kan Prime Asset Ventures Inc., na pigpapadalagan kan saindang aking si Manuel Paolo Villar.
Enot nang sinabi Sen. Camille Villar na bukas siya sa imbestigasyon kan Senado kun gusto kan mayoriya.
Mientrastanto, natapos na an imbestigasyon kan LWUA asin isinumiter na ini ki Presidente Marcos, na iyo an nag-aprobar kan rekomendasyon kaini.
Sa ngonian, dai pa ini napapaluwas kan Malacañang.
