LEGAZPI CITY – Nakatalaan na mag-abot sa aga sa Donsol, Sorsogon an cruise ship na Noble Caledonia hali sa United Kingdom lunad an 200 katawo na kumpwesto kan 100 na dayuhan na pasahero, 90 crew asin sampulong expedition officers.
Sasabaton kan mga tauhan kan DOT Bicol asin lokal na gobyerno kan Donsol sa pamamayo ni Mayor Alcantara Cruz asin representante kan local tour operator an nasambitan na barko na madaong mismo sa pantalan kan banwaan.
An mga bisitang ini an makikipag-interact sa mga butanding na saro sa mga tourist attraction sa lugar urog na ngunyan na peak season na kan Butanding Interaction kun sain haros sampulo sa mga ini an nagpapahiling kada aldaw.
Mapasiring man an mga turista sa Ticao island, partikukar sa Mababoy Village asin iba pang magagayon na lugar sa parte kan Borias Island.
Napag-araman na ini na an pang-tulos sa mga cruise ships na nag-abot sa Donsol katakod kan obheto kan DOT-Bicol sa pamamayo ni Regional Director Nini Ravanilla na magin cruise ship haven an rehiyon kun sain igwa man na napili na lugar sa banwaan na matabangan bilang parte kan Corporate Social Responsibility kan barko.
Mientrastanto, si Director Ravanilla man an napili na magpasiring sa Florida USA ngani na makipag-olay sa mga representante kan manlaen laen na cruise ship companies sa Estadus Unidos ngani na maenganyar na magpasiring sa nasyon partikular na sa Bicol region.
