LEGAZPI CITY- Inagyat ngonian kan kampo kan hepe ehekutibo sa Albay an pagluluwas nin magkakanigong ebidensya na makakapagpatotoo kan ibinuyagyag na alegasyon ni 3rd District Board Member Pem Imperial sa pigsasabing korapsyon sa quarry operations sa provincia.
Sinabi ni Danny Garcia, tagapagtaram ni Albay Governor Al Francis Bichara sa intrevista kan Bombo Radyo Legazpi na magpahiling nin klaradong prueba an bokal urog na maikokonsiderar na haka-haka o “kwentong barbero” an istorya na warang complainant.
Inapod pa ni Garcia na pagporbar sa pagdanyar sa reputasyon kan chief executive an lakdang asin nagtutubod na igwang nasa likod na political agenda.
Mientras tanto, ibinida pa kan tagapagtaram kan gobernador na naglangkaw sa P205 million para sa Setyembre ngonian na taon an koleksyon hale sa quarry sa irarom kan presenteng administrasyon kun ikukumpara sa nasa P10 million sanang koleksyon sa kada taon kan nakaaging administrasyon.
Magigirumduman na enot nang sinambit ni BM Pem sa privilege speech kaini sa Junta Provincial na nasa poco mas o menos P30 million an pigsasabing kwestiyonableng kantidad na pigkukua bilang patong sa mga ipinabakal na quarry materials sa laog sana nin anom na bulan na warang resibo.
