LEGAZPI CITY — Masaklap an naging pagkagadan kan sarong construction worker makalihis makuryente asin saka napugutan nin payo sa Barangay Salvacion sa banwaan kan Daraga, Albay.
Binisto an biktima na si Glenn Joy Buela, 22 anyos na residente kan Barangay Putiao, Pilar, Sorsogon.
Sa intrevista sa katrabaho kan biktima na si Reggie, makua kuta si Buela nin sarong balde nin hinalong semento kan mawaran ini nin balanse asin saka nagsabit sa linya kan kuryente.
Nakigkig na sana sinda kan biglang magliyab na an live wire maging an hawak kan biktima kun kaya tulos sindang naglukso hale sa piggigibong beam kan covered court na may langkaw na pitong metro sa takot na tibaad madamay.
Tulos mang idinalagan sa ospital an saro pa nindang katrabaho na si Jay-R Lorenzana na nagsapar nin mga lugar hale sa pagkakabagsak.
Dugang ni Reggie, nagsabit pa sa kudal an hawak ni Buela antes dagos mahulog sa daga na posibleng rason kan pagkakasuway kan payo kaini sa hawak.
Nakua an hawak kan biktima sa luwas kan covered court mantang nasa laog man kan edeficio an payo kaini.
Mientras tanto, segun sa operations chief ng Albay Power and Energy Corporation (APEC) na si Roger Altiche, nagsabit sa primary line an biktima kun kaya naglaog sa hawak kaini an 13,200 na boltahe kan kuryente.
Magkakaigwa man suboot sinda nin pag-oolay sa contractor kan proyekto ngane maresolba an sitwasyon kun saen posible suboot na mahampang sa reklamo an Numerical Gate Construction And Supply Corporation huli sa pagbalgar sa safety measures kan Department of Labor and Employment.
Sa ngunyan, padagos an imbestigasyon kan mga otoridad sa nasabing insidente.
