LEGAZPI CITY—Pighayag ni Albay Governor Noel Rosal na para saiya dapat na mag-uli na sa nacion si Cong. Zaldy Co asin kahampangon an saiyang mga isyu.
Sa pahayag kan gobernador sa media briefing sa Albay Capitol kan Setyembre 22, na bako sana an mga Albayano kundi haros kadaklan sa mga Pilipino an nagmamawot na madangog an kasimbagan kan kongresista sa mga kontrobersiyang ipigdadawit saiya.
Tinawan-duon ni Rosal na dapat magkaigwa ni closure sa isyu huli sa bako sana bilyones pesos an orolay digdi kundi kwarta ini kan mismong namamanwaan.
Segun pa saiya na kun ano man an paninimbagan ni Co kan siya pa an chairman kan House appropriations committee an dapat niyang simbagon.
Dugang ni Rosal na “a person should be given a day in Court,”—na bagay na dapat igwa an gabos huli sa baka suboot sala an akusasyon.
Magigiromdomang si Co an pig-akusaran na nagpropwesto nin insertions sa 2025 national budget na nagtaong pondo sa suboot mga maanomalyang flood control asin iba pang infrastructure projects alagad pinahimutikan ini kan kongresista.
Mientrastanto, padagos man na pigkua pa an reaksyon kan kampo ni Co mapadapit sa nasambitang isyu.
