Pig-agyat ni Davao City first district Rep. Paolo Duterte an mga biktima kan drug abuse asin mga komunistang rebelde na lumantad asin isiwalat an suboot kalupitan asin paglilinlang kan mga nasabing grupo na padagos na naggigibo nin kadahasan sa satuyang nacion.
Sa sarong statement, pigtawan doon kan mambabatas na kaipuhang wakasan na an katahimikan asin ilantad an mga krimen na nagibo kan mga imbwelto sa iligal na droga asin insurhensiya na kagibuhan kan New People’s Army (NPA).
Pigsabi pa ni Cong. Duterte na an saindang pagigin silensyo an nagtutugot sa padagos na mga operasyon kan nasabing mga grupo.
Dae man napugulan kan mambabatas na isisi sa NPA na inapod niyang sarong teroristang grupo asin bako mga biktima na rason kun ngata rinibong Pilipino an nawaran nin buhay, harong asin futuro.
Imbes na ipaglaban suboot an katuninongan, nagdadara an mga ini nin kadahasan, takot asin extortion sa mga komunidad.
Katakod kaini, bilang suporta sa posisyon kan saiyang ama asin dating Pangulong Rodrigo Duterte, saiyang pig-enganyar an kada Pilipino na nabiktima kan NPA o drug addicts na magtaram asin dae pagpabayaan an mga terorista na baluktuton an katotoohan.
Ginibo ni Cong. Duterte an pahayag sa tahaw kan panibagong paghihingoa kan mga mambabatas asin security officials nganing matugunan an insurhensiya sa nacion asin mga krimeng may kinaaraman sa iligal na droga partikular na sa Mindanao asin iba pang bulnerableng mga lugar.
