LEGAZPI CITY – Pigduon kan sarong kongresista na saro man sana an presidente asin bise presidente kan nasyon kaya dae na dapat pa na iseparar pa an mga Dilawan asin an mga suportadores ni Presidente Rodrigo Duterte.
Segun ki Congressman Rodel Batocabe, alagad imposible na iatras p ana isinangat na impeachment complaint kontra ki Presidente Duterte asin Vice President Leni Robredo, kinakaipuhan suboot na masabutan na an mga namamanwa man sana an masapar asin madidifisilan kun ipagpapadagos an pigigibong pag-iiriwal asin kariribukan.
Sa ibong kaini, pighayag ni Batocabe na pigrerespeto niya an opinyon ni Magdalo Representative Gary Alejano alagad mas makakarahay suboot na i-dismiss na tulos an saiyang reklamo huli ta wara man ining maitatabang sa nasyon.
Siyertong iwal man sana suboot an magigin resulta kun hahalion sinda Presidente Duterte asin VP Robredo asin labing madadagit an mga taga Mindanao kun hahalion sa pwesto an pinaka enot na presidente kan Republika kan Pilipiunas na hali sa nasambitan na rehiyon siring man sa Bicolanang bise Presidente.
Huli digdi, pigsiyerto ni Batocabe na saro siya sa mga malaban kontra sa naunambitan na impeachment.
