LEGAZPI CITY — Nanindugan an Condor Piston Bicol na ipagpapadagos ninda an plano na pagsasagibo nin hiro protesta bilang pagpapahiling nin pagkontra sa modernization program kan Duterte administration.
Segun ki Ramon Rescovilla kan Condor Piston Bicol, nakalatag na an saindang mga plano kasabay kan pagduon na tulong taon pa an kaipuhan antes ipaotob an programa basado sa napag-olayan sa pagdangog sa Senado kun kaya kinuwestyon kaini an pagpapahidali kaini.
Pigduon ni Rescovilla na ikinangangalas ninda an pagpipirit na maipaotob na an modernisasyon sa nasyon.
Pagbuyagyag pa kaini na plano ngunyan kan Local Government Unit kan Albay sa pakikipagkoordinar sa LTFRB na magbukas nkin bagong ruta kun sain malaog sa Bicol University an mga bagong E-jeep na mapasiring sa centro kan syudad kan Legazpi.
Mientrastanto, napag-araman na piglilista na kan LTFRB an mga luma nang behikulo ngani na mas magin madali na an pagriribay sa mga ini.
Nangapudan man ni Rescovilla sa gobyerno na iyo an magtao kan Euro 4 na makina na kinakaipuhan sa pagbabago kan mga ipi-phase out na pampasaherong jeep.
