Nag-poon na an conclave sa Vatican nganing pilion an kapalit ni Pope Francis, na namaaram kan Abril 21, sa paagi kan pagboto sa Sistine Chapel.
Kaipuhang makuwa kan sarong kandidato an two thirds (⅔) kan boto hale sa 133 cardinal electors nganing maging bagong Santo Papa.
Enkaso warang napiling papa makalihis an tulong aldaw, an pagboto an ipupundo nin 24 oras nganing magtaong oras sa mga cardinal na magmuni-muni.
An resulta kan kada round kan botohan an ipapahayag sa paagi kan aso hale sa tsimenea kan Sistine Chapel, itom na aso kun warang napili asin puting aso kasabay kan pag-ring kan kampana kun may bagong Papa na.
An mga boto an ipigsusurat sa papel, pigtitiklop, asin pigbubugtak sa sarong espesyal na urn sa altar kan Sistine Chapel nganing mamantenir an lihim kan botohan.
Kun warang napiling papa makalihis an 33–34 rounds kan botohan (poco mas o menos 13 aldaw), magkakaigwa nin runoff vote sa pagultangan kan duwang nangengenot na kandidato nganing maaraman an masunod na Santo Papa.
