LEGAZPI CITY – Sawi man sa pagkamoot huli sa pagbubulagan kan dating nobya, mawot kan Bombo Music Festival 2020 finalist na magin inspirasyon an kanta sa iba tangarig na magin kusog sa ibong kan distansya.
Sa intrevista kan Bombo Radyo Legazpi ki Jose LG Fuentes kan Consolacion, Cebu, aminado ining para sa dating nobya an isinurat na kantang ‘LDR’.
Dati nang naisurat an kanta alagad nagkaigwa sana suboot nin laman asin emosyon kan siya mismo an maka-eksperyensya kan kulog asin gayon kan love story o relasyon dawa sa long distance.
Pagheheras ni Fuentes na nagpasiring sa Dubai an dae na pinangaranang nobya tangarig na magtrabaho alagad makalihis an sarong taon kan magsuwayan naman an mga ini.
Dificil suboot an LDR kaya kakaipuhanon nin kusog-boot asin labing pagkamoot sa laog kan relasyon.
Napag-araman na hali si Fuentes sa pamilya nin mga musikero puon sa amang musical director sa simbahan, inang mahilig man sa kantahan asin mga tugang na anas tatao magtugtog nin piano.
Sa presente, saro man na instructor si Fuentes mantang freelance producer man sa Cebu.
