LEGAZPI CITY – Nagkaigwa nin presentasyon sa ipigkondusir na pagdangog sa probinsya kan Catanduanes dapit sa pinagkokunsiderar na pinakadakulang shabu laboratory sa nasyon kun sain ipinahiling kun papanong nakakalaog sa sarong lugar an iligal na droga.
Katakod kaini, an committee on transportation suboot an pinaka enot na ituturo asin responsable sa anuman na iligal na kontrabando na ipigbabagsak sa sarong lugar.
Segun ki Congressman Cesar Sarmiento, aminado siya na igwang pagkukulang sa lado kan mga otoridad urog na sa coast guard huli ta sa mga pantalan komon na piglalaog an mga iligal na droga kaya pigsuhestyon kaini na magin mahigot sa pagbabantay sa kadagatan.
Pigtuyaw man kaini an haloy na proseso sa imbestigasyon asin pagsasangat nin kaso sa mga indibidwal na imbwelto digdi huli sa kakulangan nin background sa mga suspek.
Dugang pa ni Sarmiento na kinakaipuhan na hilingon an anuman na package na maabot sa mga port na pigkakarga sa mga truck ngani na dae makalusot an anuman na iligal na kontrabando.
Sa presente piglalaoman na man an dobleng pwersa kan mga otoridad ngani na mabantayan an gabos na lugar sa bilog na nasyon.
