LEGAZPI CITY- Bantayan an interes kan publiko asin an national security, an abiso kan sarong miembro kan Commission on Appointments (CA) katakod kan pag-apruba sa Mislatel Consortium bilang ikatulong telco player sa Pilipinas.
Sinabi ni Ako Bicol Party-list Representative Alfredo Garbin Jr. sa intrevista kan Bombo Radyo Legazpi, prayoridad man giraray an pagsierto kan soberanya asin pangkabilugang seguridad kan nacion kun kaya magtetenir na nakabantay sa “controlling interest” kun Pilipino o Tsino an totoong nagmamanehar digdi.
Pagtataong-duon pa ni Garbin na importanteng parte kan national security an komunikasyon kun sain posibleng magamit sa pag-espiya sa mga confidential information.
Ipig-ehemplo man kan lehislador sa nagin lakdang an National Grid Corporation of the Philippines (NGCP) na ipigkontrata sa Chinese consortium na gari suboot nautro makalihis na liwat na mabuksan sa dayuhan an importanteng public utility.
Mientras tanto, dae man maibitaran na mangalas kan lehislador sa pag-withdraw asin pagkadiskwalipika kan mga nakalaban kan Mislatel bilang third telco player asin saro sana an nagqualify.
Nagpromesa man si Garbin na iimbestigaran man kan Kamara kun en kaso igwang manotaran na iregularidad asin biases sa nasabing pag-apruba.
