Inasegurar kan Commission on Elections sa publiko na dae mabayplar sa freedom of speech o expression kan mga kandidato sa 2025 midterm elections an bagong resolution para sa paggamit kan saindang social media asin artificial intelligence para sa pangangampanya.
Nakapalaog kaya sa Comelec Resolution 11064 an guideline sa paggamit kan nasabing digital platforms kun sain pigmamandato sa mga kandidato asin mga partido na iparehistro an saindang official social media accounts, websites asin online campaign platforms sa Comelec.
Kun magpalyar na magparehistro, iti-take down kan komisyon an nasabing mga account.
Sa paggamit man kan AI sa campaign materials, pigsusugo an mga ini na i-disclose an paggamit asin pinagbabawalan an mga kandidato na gumamit nin deepfake material.
Sa irarom man kan resoluston, papatawan nin multa an ‘coordinated inauthentic behavior’ na posibleng magresulta sa pag-take down kan gabos na accounts.
Segun ki Comelec chairman George Erwin Garcia na bukas an poll body para sa sarong dayalogo sa manlain lain na grupo asin election watchdogs ngani na himayon an nasabing resolusyon.
