LEGAZPI CITY- Nakaresibe na nin reklamo an Commission on Elections Bicol dapit sa nagkapirang mga barangay officials na nagpapahiling kan pagigin biased sa saindang pigsusuportaran na kandidato.
Ini makalihis na nagkapirang mga personalidad an mag-agrangay na dae pigtutugutan an paggamit nin covered court, plaza asin iba pang state resources sa mga kalaban na kandidato.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na pinatanidan na ninda an nasabing mga barangay officials na magin patas sa gabos.
Paliwanag kan opisyal na kun ipinagamit an state resources sa ibang kandidato, dapat na tugutan man an iba maski anong partido pa an dara kan mga ini.
Mientras tanto, labi na man sa 700 na mga notices an naipadara kan komisyon sa mga kandidato dapit sa mga campaign materials na nagbayolar sa polisiya kan ahensya.
Sa nasabing datos nasa 260 na an nakapag comply asin nagkusa na halion an mga campaign paraphernalia na may bayolasyon.
Marurumduman na sa ikinasang Oplan Baklas sa pagpupuon kan kampanya sa lokal na posisyon, labi sa 21,000 na mga tarpaulin an nahali kan Commission on Elections sa rehiyon.
