LEGAZPI CITY- Dae nakasalbar sa pagbaha an nagkapirang mga opisina kan Commission on Elections sa Bicol makalihis an pangrarapado kan bagyong Kristine.
Segun ki Comelec Bicol Director Atty. Jane Valeza sa intrevista kan Bombo Radyo Legazpi na dakol na mga opisina pa an dae nalalaog huli ta lubog pa sa baha hasta sa ngunyan.
Katakod kaini, pigkakahadit kan opisyal na naraot an mga computers kan ahensya.
Paliwanag kaini na kung dae nakapag back up nin mga records an mga binaha na opisina, posibleng magkondusir nin special registration sa mga lugar na naapektaran an records para sa nakalihis na tulong bulan.
Segun ki Valeza na kakayanon man an pagsasagibo nin special registration enkasong warang back up alagad magigin limitado na sana an panahon urog na ngunyan na dakol na mga preparasyon pa an pigigibo kan ahensya para sa 2025 elections.
Mientras tanto, napag-araman na stranded man ngunyan sa mga provincia kan Catanduanes asin Masbate an verification team kan komisyon na mahiling kuta sa voters registration machines.
An nasabing team an magsasagibo nin beripikasyon para sa huring preparasyon sa pag print kan pinal na listahan kan mga botante.
