LEGAZPI CITY – Tinawan doon kan sarong kongresista an saiyang ginibong interpolation sa Commission on Election sa ginibong budget deliberation para sa 2026 national budget.
Segun ki Albay 1st District Representative Krisel Lagman sa intrevista kan Bombo Radyo Legazpi na nagluwas na nin resolution an komisyon na bawal an pagpapaluwas nin ayuda asin social services sa panahon kan election period alagad nakabugtak man na igwa sinda nin hurisdiksyon na aksyonan an request para sa exemption.
Kun kaya pighapot niya na kun ano an basehan kun sa pag-exempt kan Ayuda sa Kapos ang Kita Program (AKAP) alagad warang masabi an komisyon an basehan huli ta bako man suboot ini maikokonsidera na urgent.
Sa hiling niya na warang basehan an nangyari huli ta literal na warang talagang basehan asin padagos pa man liwat an pagbabarewas kan naunambitang ayuda pirang aldaw antes an pirilian sa ibong kan ipina-otob na resulusyon.
Pigtaram pa kan opisyal na dakula an responsibilidad kan komisyon sa pagpapadagos kan programa na dae gagamiton an pondo kan tawo sa pangangampanya maski warang presenysa kan mga pulitiko.
Dae man siya na-satisfy sa kasimbagan kan komisyon huli ta iba an sinimbag kan komisyon sa saiyang kahapotan na kun ano an basehan sa pag-exempt kan AKAP na kun pwedesir man i-exempt an payout man kan para sa senior citizen asin iba pang klase nin ayuda.
Punto niya man na maski wara na an AKAP sa 2026 budget an aram kan publiko na parte ini kan mga nadiskubreng anomalya na pinondohan kan dating mga nakatukaw sa kongreso kun kaya dae na dapat ini mangyari liwat.
Pighayag pa ni puga-puga na an saindang piggigibong lakdang nganing maibitaran an pagmamani-obra kan pondo asin dapat nakakaputan muna ninda an committee report antes magsagibo nin interpolation nganing madiskutir nin matanos mantang bukas na sa publiko an bicameral Conference Committee nganing mahiling an mga insertions na gigibuhon kan mga kongresista.
