LEGAZPI CITY — Liwat na nagpatanid an Commission on Elections (COMELEC) sa mga nagkandidato kan nakalihis na barangay asin Sangguniang Kabataan (SK) elections na magsumite na kan saindang Statement of Contribution and Expenditures (SOCE).
Sa intrevista kan Bombo Radyo Legazpi ki Comelec Bicol Assistant Regional Diretor Atty. Romy Serrano, pighayag kaini na maski holiday sa aga huli sa aldaw kan Indipindencia, bukas an saindang opisina para sa mga masumiter nin SOCE.
Marurumduman na sa Hunyo 13 na an ipigtalaan na deadline kan pagsusumite kan nasambitan na dokumento hasta alas-5 nin hapon.
Napag-araman na posibleng mahali sa pwesto an mga kandidato na mapalyar na magsumite kaini.
Mientrastanto, segun ki Serrano, wara pang opisyal na komunikasyon sainda an Barangay Sagpon sa syudad kan Legazpi kun makodusir ini nin special election para sa SK makalihis na warang magkandidato kan nakalihis na pirilian.
Pag-eksplikar pa kan opisyal na ini an enot na bes na warang interesadong magdalagan sa posisyon sa SK council alagad nakasalalay na suboot sa Department of Interior and Local Government (DILG) kun magkakaigwa nin special election o ma-appoint na sana.
