LEGAZPI CITY — Ibinida kan Commission on Elections (COMELEC) Bicol sa Bombo Radyo Legazpi an magayon na resulta kan saindang satellite registration na nakua an saindang target registered voters antes pa man an deadline kan pagparehistro sa Sabado, Abril 29.
Sa intribista ki Atty. Maria Juana Valeza, Comelec Bicol director, sinabi kaini na haros otsenta y kwatro hasta sa noventa porsyento na kan mga botante an rehistrado sa bilog na rehiyon.
Kan Enero, bente mil na botante an nagparehistro, kwarenta y otso mil kan Pebrero asin nasa singkwenta y siete mil kan Marso.
Huli digdi, naglalaom suboot an saindang opisina na diit na sana an magigin pila sa Sabado maski igwa nin napag-tuudan na ugali an mga Pilipino na pagruso tuyong aldaw na kan deadline.
Sa ibong kan nakuang datos, ipinahayag ni Valeza na pighihiling ninda an plano ni Presidente Rodrigo Duterte na isuspinder an Barangay asin SK elections sa Oktubre na nakaapektar sa numero kan mga nagpaparehistrong botante.
Mientrastanto, nagpatanid an direktor sa publiko na sa huring aldaw kan voter’s registration, magpapautob an gabos na Comelec offices sa Bicol nin mahigot na pag-obserbar sa cut-off na alas singko nin hapon.
Segun ki Valeza, kun en kaso dakol pa an nakapila pag-abot kan alas tres sagkod alas singko, an mga nasa laog na sana kan 30-meter radius an saindang ililista asin dae na tatawanan nin konsiderasyon an mga nasa luwas.
Maduon na sinabi kan opisyal na dae nin magigin extention kan deadline.
