LEGAZPI CITY – Nanindugan an Commission on Elections Bicol na magpapadagos an registration sa mga bagong botante para sa Barangay and Sangguniang Kabataan elections (BSKE).
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na idadagos an preparasyon para sa registration maski pig-oolayan sa kamara an posibleng postponement kan nasabing pirilian.
Mapoon suboot an registration sa Hulyo 1 hasta 11, alas otso nin aga sagkod alas singko nin hapon, poon lunes hasta domingo asin bukas sinda maski holiday.
Bukas man an saindang registration period para sa mga regular voter na magpa-reactivate asin mga Sangguniang Kabataan registrants na 15 anyos pataas sa mismong aldaw kan pirilian.
Pigtaram pa ni Atty. Valeza na halikpot an durasyon kan pagpaparehistro huli man sa isasagibo na Bangsamoro Parliament election kun kaya kaipuhan ninda na dae pagsagadon an saindang timeline nganing gabos ining maisagibo sa tamang aldaw asin oras.
Mientrastanto, naghagad man nin dispensa an opisyal sa mga paratukdo na nagserbi kan nakaaging pirilian huli ta dae ninda naibarewas an kadugangang honoraria huli ta nagtaong dalan muna sinda sa pagsumite kan Statement of Contributions and Expenditures (SOCE).
Pagsyerto man sainda ni Atty. Valeza na pagkatapos kan SOCE filing an tulos man nindang ibabarewas an nasabing dagdag kompensasyon.
){kind=link}