LEGAZPI CITY- Ininspeksyon na an mga technical hubs sa rehiyong Bicol ngani na masierto an kahandaan para sa nagdadangadang na May 2025 elections.
Segun ki Commission on Elections Bicol Director Atty. Jane Valeza sa intrevista kan Bombo Radyo Legazpi na dapat na masierto na nakahanda an mga ekipahe na nasa pasilidad kan ahensya.
Napag-araman na igwang sarong technical hub sa kada provincia sa rehiyon, afuera sa provincia kan Masbate na igwang tulong hubs huli sa mga hararayong isla na kinakaipuhan na matawan nin atensyon.
Mamandugan an nasabing mga hubs kan mga representante hali sa Department of Information and Communications Technology, Commission on Elections, Department of Science and Technology asin pwedesir man na obserbaran kan mga watchers kan political parties asin kan Parish Pastoral Council for Responsible Voting.
Segun pa sa opisyal na an gabos na kinakaipuhan na ekipahe an itatao kan Korean firm na MIRU systems ngani na magin handa sa pirilian.
Mientras tanto, pinaglalaoman na man an pagpupuon kan deployment kan mga automated counting machines sa rehiyon.
