LEGAZPI CITY- Nagpapadagos an preparasyon kan Commission on Elections Bicol mantang naghahalat kan magigin pinal na desisyon sa pinagdedebatehan kan Senado na fixing of terms kan mga Barangay asin Sangguniang Kabataan Officials.
Ini an katakod kan propuestong pagpapalawig kan termino kan nasabing mga opisyal hali sa apat na taon pasiring sa limang taon.
Segun ki Comelec Bicol Director Atty. Ma. Juana Valeza sa intrevista kan Bombo Radyo Legazpi na hasta sa dae pa naisasa-ley an nasabing propuesto magpapadagos an aktibidad kan komisyon.
Naglalaom man an opisyal na matawan na nin malinaw na desisyon sa masunod na semana.
Dagdag pa ni Valeza na nakatalaan na kutang mag-imprenta an ahensya kan computerized voter’s list alagad paramientras ining inoktaba huli sa paghahalat sa desisyon sa nasabing propuesto.
Paliwanag kan opisyal na nasa limang milyon na pangaran sa Bicol an kinakaipuhan na i-imprenta kaya nangangaipo ini nin dakulang pondo asin habo kan komisyon na masayang sana kun dae man malalawos an pirilian ngunyan na taon.
