LEGAZPI CITY- Paramientras na suspendido ngunyan an gabos na mga preparasyon na pigigibo para sa nakatalaan kuta na Barangay asin Sangguniang Kabataan elections sa Disyembre.
Marurumduman kaya na ini-atras man an nasabing pirilian asin pigtalaan sa masunod na taon.
Segun ki Commission on Elections Bicol Director Atty. Juana Valeza sa intrevista kan Bombo Radyo Legazpi na malawos man o dae an eleksyon, pirmihan na nakahanda an saindang lado.
Alagad aminado an opisyal na garing napapanahon man an nasabing postponement huli ta posibleng madifisilan sa sitwasyon sa provincia kan Masbate.
Napag-araman kaya na dakol na mga classrooms an nadistroso makalihis an pangrarapado kan bagyong Opong sa island province.
Segun pa ki Valeza na padifisilan man sa ngunyan an komunikasyon sa mga Comelec offices sa provincia kan Masbate huli sa kawaran nin signal asin supply nin internet asin kuryente.
